Kalaallit Ilinniagaqartut Kattuffiat naalisarlugu KIK-mik ulluinnarni taasakkatsinnut tikilluarit.

KIK tassaavoq nunatsinni ilinniagaqartut Kattuffiat, ilinniartut piumasut ilaasortaaffigisinnaasaat.

KIK-p ulluinnarni suliaasa annerpaartaraat ilinniartut atugarisaatigut pitsanngorsaaqataassalluni. Taakkunanit makku assigiinngitsut eqqaaneqarsinnaallutik: Ilinniartoq sungiusaammik suliffiminit atuagarsorfimminnilluunniit arlaatigut eqqunngitsumik pineqaruni KIK aqqutigalugu ikiorneqarsinnaalluni.

Tamatuma saniatigut tapiiffigineqarsinnaapput soorlu isaruarsiniarnermik. Nakorsap innersuussutaanik isaruartaartoqassappat takussutissalimmik tunniussinikkut tapiiffigineqarsinnaapput. Taavalu maanna Nuummi KIK-p allaffiani ilaasortanut akikinnerusumik bussinut klippekortisisoqarsinnaavoq. Ilaasortallu sinerissami niuertarfinni akikillisaaffiusuni ilaasortaanermut allagartatik atorlugu akikillisaaffigineqarsinnaapput.

KIK-p oqaluttuarisaanera 24. oktoberi 1982 pisortatigut aallartissimavoq. Aallaqqaammullu ilinniartut tamavimmik pinngitsooratik KIK-mut ilaasortanngortinneqartarsimapput. Ukiunili kingulerni pissutsit allanngorsimapput, tassa suut tamaasa demokratiskiusumik ingerlaleramik. Tamannalu isumaqarpoq KIK ilaasortassarsiortariaqalerneranik namminneq kajumissutsiminnik ilaasortaajumasunik. Namminneq kajumissutsiminnik ilaasortanngortut maanna amerliartuaarput, ingammik aamma aningaasarsiamikkut illersorneqarsinnaanertik paasigaangamikku.

Massakkut suliatta pingaarnersaraat KIK kingumut siumut ingerlaqqilernissaa. Tassalu nutarterineq pitsanngorsaanerlu pingaarnerutinneqarluni.

Aammalu kingullertigut eqqartortarparput ullutsinni ilinniartunut atugassarititaasut ilungersunartorsiorfiusaqisut qaangerniarlugit siunissarlu ilinniartussanut oqinneroqqullu pitsanngorsaajuarnissaq nutarteriuartarnissarlu ilinniartut ajunnginnerusumik atugaqartitaanissaat anguniarlugu.

Neriuutigaarpullu ilinniartut ilinnialertussallu KIK soqutigalugu paasilluarlugulu ilaasortaaffigisassagaat.

Inuiaqatigiillu kikkulluunniit angajoqqaat, aappaasut, ilaqutaasut ikinngutaasullu tapersersuisutut peqataanerusarnissaat pisariaqarteqaarput.  Kikkulluunniit tapersersueqataanissaannut periarfissaqarput sutigulluunniit tapersersuinissaminnut. Kissaatiginarteqaarput siunissami ilinniartussat ullumikkumiit pitsaanerusumik atugaqarsinnaalernissaat, tamannalu KIK-ip anersaaralugulu siunertaraa.

Ikinngutinnersumik

Didda Isaksen Petersen
KIK-mi siulittaasoq

Nuuk 25. april 2009